2 patay, 2 missing, 1 naospital matapos nalumos samtang nagapaligo sa Taraw Falls sa Antique

Antique  — Duha ang patay, duha ang missing kag isa naospital matapos nalumos samtang nagapaligo sa Taraw Falls sa Trinidad, San Remigio, Antique alas-3:15 kahapon sang hapon, Mayo 19.

Ginkilala ang napatay kanday Wylen Grace Dalmacio, 21-anyos sang Odiong, Sibalom kag Alyas Ben, 16-anyos sang Cabiawan, San Remigio.

Missing naman sanday Mary Adela Jayme, 27-anyos kag Alyas Budong, 9-anyos, lunsay residente sang Cabiawan, San Remigio. Nakaluwas naman kag padayon nga ginabulong sa ospital si Alyas Renalyn, 10-anyos nga taga- Cabiawan, San Remigio.

Suno kay Police Staff Sergeant July Job Miles sang San Remigio Police Station, nagapaligo sa falls ang lima sang hinali lang nga nagtaas ang lebel sang tubig halin sa bukid kasunod sang pagbubo sang ulan.

Nagbaskog man ang current sang tubig rason nga naanod ang lima.

Una nga nakit-an si Dalmacio kag Renalyn kag gilayon nga gindala sa ospital pero gindeklarar nga patay si Dalmacio.

Kasunod nga nakit-an si Ben kag dead on arrival man sa ospital.

Nagapadayon pa ang search and rescue operation sang mga otoridad sa mga missing. (JoMaque)