Hustisya, panawagan sang pamilya sang magtiyo nga nasapwan patay sa Jaro

Iloilo City (UPDATE) — Hustisya ang gina-singgitan sang pamilya sang mag-tiyo nga ginpatay kag nasapwan sa Balabago, Jaro kaina sang kaagahon, Mayo 21.

May pilas sang pagkitiro, naburambudan sang transparent nga tape kag nabaklid sang nasapwan ang magtiyo nga sanday Jimrod Eribal, 22 anyos sang San Isidro, Jaro, kag Tristan Zachary Eribal, 20 anyos sang Caingin, Lapaz.

Suno kay Helen Eribal, lola ni Tristan, mabuot ang iya apo kag wala sang kontra. Ginpanginwala man niya nga nagagamit sang illegal nga druga ang iya apo.

Nahagaran lang suno sa iya nga mag-inom si Tristan sang ginsulod sang mga lalaki kag pilit nga ginkuha.

Gin-ako ni Helen nga may nagkadto sa ila balay sang Mayo 18 kag ginapangita si Tristan bangud gina-angot siya sa hold-up incident. Natabuan nga wala si Tristan sa ila balay gani gindala na lang ini sa Lapaz Police Station sang iya ginikanan agud ipa-identify sa biktima. Ginpapuli si Tristan matapos ginhambal sang tagreklamo nga indi siya involved sa pagpang-hold-up.

Nagpahayag naman si Rowena, iloy ni Jimrod, nga mabuot kag mapisan ang iya bata.

Suno sa iya, wala nakapanugid si Jimrod nga may nagadumot sa iya rason nga blangko sila kon sin-o ang nagpatay sa biktima.

Ginpanginwala man ni Rowena nga nagagamit sang illegal druga si Jimrod.

“GINA-ANGOT SA ILLEGAL DRUGS”

Gin-aku ni San Isidro Punong Barangay Felix Dureza nga may impormasyon sila nga nabaton halin sa Barangay Anti Drug Abuse Council (BADAC) Auxillary nga nagagamit si Jimrod sang illegal nga druga. Pero maid-id pa nga gina-verify ang amo nga impormasyon.

Ang kapitan ang nagpamat-od nga maayo makig-upod si Jimrod pero may batasan nga masabad ang iya baba. (JoMaque)