(UPDATE) Call center agent nga gintiro sa Mandurriao, napatay samtang ginabulong sa ospital

Iloilo City — Napatay samtang ginabulong sa ospital ang 34-anyos nga call center agent nga gintiro sang duha ka wala makilal-an nga mga lalaki sa Barangay Airport sang Mayo 24, pasado las-11 sang gab-i.

Suno kay Police Major Marlon Valencia, hepe sang Mandurriao Police Station, napatay si alyas John kaina sang kaagahun, Mayo 27.

Gindala sa ospital si John bangud sang pilas sa liog.

Naga-istoryahanay si John kag ang duha ka wala makilala-an nga mga lalaki sang hinali lang nakabati ang duha ka security guards malapit sa area sang tatlo ka lupok kag nasapwan ang biktima nga nagahuray-ad.

Gilayon naman nga nagpalagyo ang mga suspetsado sakay sa motorsiklo.

Nagapadayon ang imbestigasyon sang mga pulis sa krimen. (AGB/AT)