Construction worker nga nasapwan patay, ginapatihan sang police nga nakuryente

San Miguel, Iloilo — Nasapwan nga nagahapaun kag patay na ang construction worker sa subdivision sa Barangay San Jose, San Miguel subong nga aga, Mayo 27.

Ginkilala ni Police Major Jojo Tabaloc, hepe sang San Miguel Police Station ang lalaki kay Jose Wilbon Sulliva, 30-anyos sang Igcabito-on, Miag-ao.

Ginapatihan nga nakuryente si Sulliva bangud nakita nga sunog ang iya kumalagko sa tuo nga tiil.

Nagapati ang pulis nga nalapakan ni Sulliva ang alambre nga naka-angut sa post sang kuryente. Nagawayway man ang kable sang kuryente sa amo nga poste.

Nakit-an siya may 30 metros halin sa ila nga barracks.

Nag-inum-inom kagab-i si Sulliva upod ang iban nga construction workers.

Naguwa si Sulliva bangud posible maggamit sang comfort room suno kay Tabaloc. (AGB/MO)