ATOP, indi komporme sa proposed Anti-Counterflowing Ordinance sa syudad

Iloilo City — Indi komporme ang Association of Taxi Operators in Panay (ATOP) sa proposed ordinance ni Councilor Lyndon Acap nga himuon nga traffic violation ang overtaking.

Suno kay ATOP President Perfecto Yap, indi nila mahangpan ang proposisyon sang konsehal bangud may na-define na sa laye ang overtaking kag counterflowing.

Ang paghimo suno sa iya sang isa pa ka definition ang magahatag lang sang pagsalangisag sa mga pasahero kag sa mga drivers.

Ginpabutyag ni Yap nga may epekto sa kita sang mga taxi drivers kon dumilian ang pag-overtake bangud importante sa ila ang kada segundo kag minuto.

Kalabanan man suno sa iya sa mga nagasakay sa taxi ang luyag sang convenience kag nagadali nga makalab-ot sa ila destinasyon.

Posible suno kay Yap nga mahimo sila ang position paper angut sa proposed ordinance ni Acap. (AGB)