PDEA 6, magahiwat sang symposium sa pagbukas sang klase

Region 6— Magahiwat sang drug symposium ang Philippine Drug Enforcement Agency ukon PDEA 6 sa mga eskwelahan sa Western Visayas sa pagbukas sang klase sa Hunyo 3.

Suno kay PDEA 6 Director Alex Tablate, importante nga mapaathag sa mga kabataan ang malain nga epekto sang illegal nga droga agud sila mismo indi maimpluwensiyahan sang mga durugista.

Pinaagi sa drug symposium, mahibalu-an man sang kabataan ang mga layi nga malapas nila sa oras nga mag-intra sila sa iligal nga droga.

Para makahiwat sang symposium ang PDEA 6, nagpangabay si Director Tablate sa mga eskwelahan nga magsulat sa ila opisina para ma-schedule kag mahatagan sang oras.

Ang paghiwat sang drug symposium kabahin sang prevention program sang ahensya agud indi mabiktima ang mga kabataan sang illegal nga droga. (JoMaque)