Bangkay sang 7-tuig nga bata nga babaye nga nasulod sa saku, nasapwan sa basurahan sa Negros Occidental
Western Visayas — Bangkay na sang nasapwan ang pito ka tuig nga bata nga babaye sa Victorias City, Negros Occidental las 8:42 kagab-i, Hunyo 2.
Nasulod sa saku ang bangkay sang bata kag ginhal-id sa basurahan sa Zone 1 Villamiranda, Brgy. 6-A.
Suno kay Police Master Sergeant Hazel Dorado, chief sang Women and Children’s Protection Desk sang Victorias City Police Station, nakabaton sila sang tawag nga may nasapwan nga bangkay sang bata kagab-i.
Las-12 kahapon sang udto sang ginpahayag nga ginsugo ang biktima sang ila kasilingan nga si Mark Besa nga magbakal sang sigarilyo pero wala na nakabalik ang bata.
Sa inisyal nga imbestigasyon sang mga pulis, ginapatihan sang pamilya nga si Besa ang nagdala sa bata kag posible may kahilabtanan sa pagpatay sa biktima.
Wala sang pilas nga nakita sa bangkay nga natalana ipa-autopsy.
Naga-estar ang bata sa iya lola samtang nagatrabaho naman sa Iloilo ang iya iloy.
Nadakpan ang suspek sa Ajuy, Iloilo suno kay Police Major John Van Luspo, hepe sang Ajuy MPS. (AGB/MO)