IPPO, posible lain ang rekomendasyon ipaangid sa Pototan Police Station sa ila imbestigasyon sa ginpahayag pagkastigo sang mag-utod nga pulis sa preso sa Pototan

Sta. Barbara , Iloilo  — Posible nga maglain ang rekomendasyon sang Iloilo Police Provincial Office ipaanggid sa Pototan Police Station sa ila imbestigasyon sa ginreklamo sang preso nga pagkastigo sa iya sang mag-utod nga pulis.

Ini suno kay Police Major Raymond Celoso sang Provincial Investigation and Detection Management Section.

Suno kay Celoso, posible magkasubong ukon maglain ang rekomendasyon sang IPPO ipaangid sa Pototan Police Station nga naghimo man sang separado nga imbestigasyon depende sa dalagan sang ila imbestigasyon.

Gina-finalize pa sang PIDMS ang ila report nga natalana man isumiter sa Police Regional Office (PRO) 6.

Una na ginrekomendar ni Police Major Ronnie Brillo, hepe sang Pototan Police Station sa IPPO ang pagpasaka sang grave misconduct batuk kanday Police Staff Sergeant Erwin Acosta kag Police Staff Sergeant Ravelo Acosta Jr. matapos ginreklamo sang preso nga si Emmanuel Adoracion kag sang utod niya nga si Sarralyn nga nagkastigo sa ila.

MAY PROCEDURAL/LEGAL LAPSES?

Nasentro ang imbestigasyon sang PIDMS kun may procedural ukon legal lapses sa pulis sa ila pagdakop kay Adoracion.

Una na ginpahayag ni Adoracion nga ginsulok-sulok siya sang mag-utod nga pulis sang halos dungan sila nga nag-abot matapos na-angut sa komosyon.

Nagreklamo man si Sarralyn nga gingan-it siya sa buhok kag ginlampos sa duta ni Ravelo.

Padayon ang pagserbisyo sa Pototan Police Station sang mag-utod nga pulis nga lunsay ginpanginwala ang akusasyon batuk sa ila. (JoMaque)