Empleyado sang DAR nga gintiro-patay sa Jaro, may nagadumot sa iya –Magulang
Jaro, Iloilo (UPDATE) – May nagadumot sa empleyado sang Department of Agrarian Reform nga gintiro-patay sa Tagbak, Jaro kahapon sang aga, Hunyo 6.
Ini ang pahayag ni Catalina Salario, magulang sang biktima nga si Allan, 51 anyos kasunod sang krimen.
Suno kay Catalina, nakapanugid ang biktima nga may nagadumot sa iya pero nagpamalibad ang magulang nga isugid kon may kaangtanan ini sa trabaho ukon personal nga kabuhi.
Ginpasiguro man niya nga isugid niya sa kapulisan ang iya nahibaluan agud mahatagan sang hustisya ang kamatayon sang iya manghod.
Naga-isahanon lang nga naga-istar sa Tagbak, Jaro ang biktima.
Nagahimos na siya kaina agud magtrabaho sang gintiro sang suspek.
‘MABUOT SA TRABAHO’
Ginakasubo naman sang Department of Agrarian Reform Iloilo ang natabu nga pagpatay sa ila empleyado.
Suno kay DAR- Iloilo Provincial Director Lucrecia Taberna, nagalaum sila nga mahatagan sang hustisya ang kamatayon ni Salario.
Kilala nga mabuot suno kay Taberna si Salario rason nga sila mismo ang nakibot sa natabu sa biktima.
Hulaton sang ahensiya ang resulta sang imbestigasyon sang Philippine National Police agud makahatag sang bulig sa biktima.
Ginpasiguro niya nga ang DAR nakahanda nga maghatag sang legal assistance kag iban pa nga sahi sang bulig angut sa natabu sa biktima. (JoMaque)