Anay Provincial Administrator Manuel Mejorada, nagpiyansa sa iya kaso nga cyber libel

Iloilo City — Temporaryo nga nahilway si anay Provincial Administrator Manuel “Boy” Mejorada matapos nga nakapiyansa sa lima ka counts sang cyber libel kahapon sang udto, Hunyo 8.

Sa iya nga Facebook live, ginsugid ni Mejorada nga gin-aprobahan ni Hon. Judge Mark Anthony Polunan sang Municipal Trial Court in Cities (MTCC) Branch 8 ang iya bail request.

Ginpakita man ni Mejorada ang kopya sang order of release nga gin-issue ni Judge Polunan.

Masobra P50,000 ang ginbayaran nga piyansa ni Mejorada.

Nag-ugat ang kaso sa ginbuyagyag ni Mejorada nga kontrobersiya sa landscaping project sa Iloilo Provincial Capitol nga suno sa iya bisan isa ka bes, wala gid nagpaathag si Governor Arthur Defensor.

Sa pihak sini, nanindugan si Mejorada nga awayon niya ang kaso kag madamu pa siya sang mga dokumento nga ipaguwa angut sa iya ginbuyagyag batuk sa gobernador.

Wala man ginpalampas ni Mejorada ang indi suno sa iya husto nga pagserbi sa iya sang warrant of arrest ni Police Major Jonathan Pinuela, head sang Provincial Special Operations Group sang Iloilo Provincial Police Office.

Ginakuwestyun ni Mejorada ang indi pagsoksok sang uniform ni Pinuela, pagsulod sa iya balay nga wala sang pahanugot kag ginpahayag pagpahog sa iya sang pulis.

PAHUWAY SA OSPITAL

Ginpahibalo man ni Mejorada nga nagapahuway-huway siya subong sa ospital kag nagahulat sang clearance sang iya doktor kon san-o siya makapauli.

Gindala sa Iloilo St Paul’s Hospital si Mejorada matapos nagtaas ang iya blood pressure pila ka oras nga gindala siya sa Pavia Police Station kasunod sang pagserbi sa iya sang warrant of arrest sang Hunyo 7 sang gab-i. (JoMaque)

About Post Author

Aksyon Radyo Iloilo 720Khz

admin@aksyonradyoiloilo.com.ph

http://aksyonradyoiloilo.com.ph

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %