3 nadakpan sa illegal fishing sa Dumangas

Iloilo — Tatlo ang nadakpan sa illegal fishing nga gin-operate sang Dumangas police kag Bantay Dagat sa Bakay, Dumangas kahapon, Hunyo 9.

Ala-1:30 sang hapon sang nadakpan si Dario Dorimon, 33 sang Sum-ag, Bacolod City nga illegal nga nagapangisda sa baybayon sang nasambit nga lugar.

Gin-confiscar sa iya ang ginabanta tatlo ka kilo sang magagmay nga isda, pukot kag motorbanca nga iya gingamit.

Las 2 naman sang hapon sang nadakpan sanday Joel Fundador, 55 kag C-Jay Ebalca, 22, pareho nga taga-Sum-ag, Bacolod City.

Nakuha sa ila ang ginabanta tatlo ka kilo nga magagmay nga isda, pukot kag motorbanca nga gingamit.

Suno kay Police Senior Master Sergeant Kim John Banzon sang Dumangas Police Station, wala sang permit halin sa LGU ang mga nadakpan kag naggamit sila sang mapino nga pukot sa pagpangisda. (JoMaque)