Lalaki nga nasapwan sa Sta. Barbara, nakilala na ; Motorsiklo nga narecover, gin-carnap suno sa pulis

Sta. Barbara, Iloilo (UPDATE) — Nakilala na ang lalaki nga nasapwan sa higad sang karsada sa Barangay Bitaog -Taytay sang Hunyo 8 sang gab-i.

Suno kay Police Chief Master Sergeant Jesus Wilson Saludares, deputy chief of police sa Sta. Barbara Police Station, positibo nga ginkilala ang 23-anyos nga biktima sang iya tiyo paagi sa iya mga panapton.

Nag-ayo naman ang tiyo nga indi lang anay paghingadlan sa publiko ang biktima bangud wala pa nakahibalo ang iya amay nga na-admit sa ospital kag natalana nga operahan.

May asawa kag duha ka mga kabataan ang biktima nga nagabulig sa iya amay sa pagdeliver sang itlog.

‘CARNAP ANG MOTOR’

Una nga nakabaton sang impormasyon ang Sta. Barbara police nga may nadulaan sang motorsiklo sa Lambunao rason ginfollow up.

Ginkadtuan naman sang tag-iya sang motorsiklo ang salakyan sa Sta. Barbara Police Station kag positibo ini ginkilala nga iya.

Bangud sini, nagpati ang Sta. Barbara police nga posible tumandok sang Lambunao ang lalaki nga una nga nasapwan sa Brgy. Bita-og Taytay.

Nakilala sang pulis sa Lambunao ang biktima paagi sa description nga ginhatag sang pulis sa Sta. Barbara rason gilayon nga nagcontact sa pamilya sang natungdan para sa confirmation.

Gina-imbestigaran pa sang pulis ang kaangtanan sang biktima sa pagcarnap sang motorsiklo lakip ang motibo sa pagtiro-patay sa iya. (JoMaque)