Pagtimbuok sang kaso sang dengue sa syudad, maka-alarma suno sa City Health Officer

Iloilo City — Gin-ako ni City Health Officer Dr. Bernard Caspe nga makaalarma ang pagtimbuok sang kaso sang dengue sa syudad.

Pero ginapaabot na niya nga matabu ini bangud sang ginatawag nga three-year cycle base man sa ila obserbasyon.

Suno kay Caspe, ulihi nga nagtaas ang kaso sang dengue sang 2016 sa diin masobra 1,800 ang na-record sang CHO.

Ang tanan suno sa iya nga ginkagat sang lamok sa amu nga tuig ang naka-develop sang 6-month immunity sa tanan nga first strain sang dengue.

Ini ang rason kun ngaa nagnubo ang ila narecord nga dengue cases sang 2017.

Sang 2018, amat-amat naman nga nagsaka suno sa iya ang dengue cases bangud amat-amat man nga nagakadula ang immunity sa kagat sang lamok.

Sa ikatatlo nga tuig ukon 2019 nga amu ang final cycle, magasaka ang kaso sang dengue suno kay Caspe.

Sa una nga anum ka bulan sang tuig, nakarecord sang 421% nga pagtaas sa kaso sang dengue ang Iloilo City kag may apat ka patay suno sa Department of Health 6. (AGB)