Mag-asawa, nabunggu-an patay samtang nagatabok sa Diversion Road, Mandurriao

Iloilo City — Pareho gindeklarar nga napatay sa ospital ang mag-asawa nga nabungguan sang salakyan samtang nagatabok sa pedestrian lane sa Diversion Road Mandurriao mga las 6 subong nga aga, Hunyo 15.

Ginkumpirmar ni Police Master Sergeant Alfredo Masamong, nga las 7:30 sang nga aga sang gindeklarar nga napatay sanday Joemarie Osano kag Alnie Dinah Pet-Osano sang Leofel Village Subdivision, Brgy. Ticud, La Paz.

May head injury kag bali ang tiil sang lalaki samtang may pilas sa abaga, baba kag sag-ang ang babaye.

Halin ang duha sa area sang Injap Building kag patabok na sa Boardwalk sang natabu ang aksidente. Pa-direksyon sang SM City ang salakyan.

Ginapatihan nga mapadulong ang duha sa Esplanade kun basehan ang ila suksok nga pang-jogging ukon pang-walking.

Ginpahayag nga madasig ang padalagan sang salakyan kag nag-overtake sa pick up tubtob nga nabungguan ang mga biktima.

Suno kay Lloyd, nakakita sa natabu, naglupad ang babaye sang nabungguan samtang ginyudyod naman sang ginabanta 30 metros ang lalaki.

Gin-abandonar ang salakyan nga may ngalan kag logo pa sang hotel sa atubang sang Diversion 21 Hotel. Gupi ang tuo nga parte sang salakyan kag naga-aso pa sang ginbilin sang driver nga nakilala kay June Paul Valencia, 32-anyos. Nagsurrender ang driver sa Mandurriao Police Station. (JoMaque)