Lalaki nga nahulog sa mixer sang frozen foods sa Mansaya, Lapuz, intact pa ang ulo kag may bali sa tuo nga kamot

Read Time:1 Minute, 35 Second

By: JoMaque | Updated as of 8:18 AM, June 24, 2019

Lapuz, Iloilo City — Intact pa ang ulo kag may bali sa tuo nga kamot ang lalaki nga trabahador nga nahulog sa mixer sa paghimo sang frozen foods sa Brgy. Mansaya, Lapuz sang Hunyo 22.

Ini ang gin-athag ni alyas Jude, embalsamador sang punerarya nga nagkuha sa lawas ni Jomar Junco Bugoy, 18 anyos sang Laua-an, Antique.

Una na ginpahayag ni alyas Karl, upod sa trabaho ni Bugoy kag amo ang nakakita sa natabu, nakibot na lang siya sang naabtan nga yara na sa ibabaw ang tiil ni Junco kabangdanan gindali-dali niya gabot sa saksakan ang makina kag ginhingagaw pa kuha ang biktima pero nakasulod na suno sa iya ang katunga sang iya lawas.

Ginapatihan ni Karl nga sang nagguwa siya agud magkuha sang liabe sa ila quarters, ginmatu-matuhan ni Bugoy operate ang makina kag posible nga may ginkuha siya sa mixer tubtob nga aksidente nasuok ang iya kamot.

Ginpahayag naman ni Police Corporal Jeniffer Espora sang La Paz Police Station nga wala sang foul play sa kamatayon ni Junco rason nga wala na nagkadtu ang Scene of the Crime Operatives (SOCO) sa lugar.

Base sa imbestigasyon sang La Paz police, gintinluan ni Bugoy sang iya kamot ang mga naga-awas nga ingredients sa mixer pero aksidente nga nasu-ok ang iya kamot.

BULIG SA PAMILYA NI JOMAR JUNCO BUGOY

Nagpasalig naman ang tag-iya sang frozen foods factory nga buligan ang pamilya sang ila trabahador.

Suno kay Mrs. Loreta Diaz, iloy sang tag-iya nga si Josielor Jaleco, wala man sila ginabasol sang pamilya sa natabu kay Bugoy apang nagpangabay nga buligan sila sa gasto.

Una na ginpahayag ni Mrs. Josielor Jaleco nga indi makahibalo maggamit sang makina si Bugoy.

Ginpahibalo man ni Mrs. Diaz nga gin-dispose na nila ang mixer kag mabakal na lang sang bag-o kasunod sang insidente.