By: JoMaque | June 24, 2019, 8:53 AM

Iloilo City — Ginpakigbahin sang 19-anyos nga graduate sang West Visayas State University ang iya ‘sikreto’ sa pagpanguna sa Nursing Licensure Examination ukon NLE 2019.

Suno kay Almira Louise Hinsoy nga tumandok sang Barangay Bilao, Sapian, Capiz, dako gid ang nabulig sang pagtuo kag pagpangadi sa iya kadalag-an.

Antes mag-umpisa kag pagkatapos sang review, nagapangadi ang batch ni Hinsoy para giyahan sa pagkuha nila sang examination.

Sa pihak sang kasako sa pagtuon, naga-alokar man sang tyempo ang batch ni Hinsoy para magsimba kada Dominggo.

Kinahanglan man nga magpaninguha sa pagtuon apang importante man nga magpahuway.

Nag-aspirar si Hinsoy nga madala sa Top 10 apang wala naglaum nga siya ang magpanguna sa prestihiyoso nga examination nga may 87.40% rating kasubong kay Jeremiah Paula Austria Caceres sang Angeles University Foundation.

Wala pa nakadesisyon si Hinsoy kun ma-practice sang iya propesyon ukon magpa-enroll sa kurso nga Medicine.

‘SALAMAT’

Gilayon naman nga nagpasalamat si Hinsoy sa Ginoo kag sa iya ginikanan sang nakunfirmar ang resulta sang examination.

Gin-ako ni Hinsoy nga may kahigayunan nga nabudlayan na siya sa pag-eskwela kag pagtuon apang naghatag sa iya sang inspirasyon ang iya ginikanan kag pamilya.

Ginapasalamat man ni Hinsoy ang ila mga Clinical Instructors sa College of Nursing sa pagtudlo kag pagpreparar sa ila batch sa pagkuha sang licensure examination.

Ginapasalamatan man ni Hinsoy ang mga opisyales sang WVSU sa pagsuporta sa ila.

’WVSU GINDOMINAR ANG TOP 10’

Gindominar naman liwat sang WVSU ang top 10 sa Nursing Licensure Examination.

Magluwas kay Hinsoy, nadala man sa Top 10 ang 12 pa ka iban mga mga graduates sang WVSU nga ginkilala kanday;

Dennise Kim Marie Luig (Number 2 nga may 87.20% rating)

Michaelle Christiane Con-El (Number 3 nga may 87% rating)

Gerone Marie Saquian (Number 4 nga may 86.80% rating)

Shaniah Grace Condag, Joseph Dann Enero Jr.,kag Kaila Mae Macairan (Number 5 nga may 86.60% rating)

Thomas Benroe Supeña (Number 7 nga may 86.20% rating)
Jenrose Buenvenida kag Rona Jane Lanzuela (Numer 9 nga may 85.80% rating)

Tristan James Amaguin kag Angel Mae Malones (Numer 10 nga may 85.60% rating)

‘100 PASSING RATE’

Nakapasar man ang 163 tanan nga mga graduates sang WVSU nga nagkuha sang NLE 2019.

5,059 sa 9,691 ukon 52.20% sang mga nagkuha sang NLE 2019 ang nakapasar suno sa Professional Regulation Commission.

Nagapati si Hinsoy nga tradisyon na sang WVSU ang ‘excellence’ rason masami nga mataas ang passing rate kag madamo man sang mga graduates nga topnotchers.

Matandaan, 8 ka mga graduates sang WVSU ang nadala man sa Top 10 sa Nursing Licensure Examination sang nagligad nga tuig.

Magluwas sa NLE, top performer man ang WVSU sa Physician’s Board Examination kag Licensure Examination for Teachers.