Ginatudlo nga NPA leader sa Negros nga nadakpan sa Capiz, May kapin P1-M nga patong

By: JoMaque | June 25, 2019, 9:29 AM

Via Aksyon Aljohn Torreta

Iloilo City — Gindakup ang ginpahayag leader sang New People’s Army sa Negros matapos ginserbihan sang apat ka mga warrants of arrest sa Poblacion Tacas, Cuartero, Capiz sang Hunyo 23.

Suno kay Police Regional Office 6 director Brigadier General John Bulalacao, 2000 tubtob 2004 sang nangin aktibo ang subject nga si Baltasar Saldo nga nagdala sang pangalan nga Virgilio Paragan alias Hassan, 54-anyos sang Barangay Sto. Angel, Dumalag, Capiz, sa Communist Party of the Philippine-New People’s Army (CPP-NPA).

Dugang niya, nangin commanding officer pa sang Roger Mahinay Command, Komiteng Rehiyon-Negros si Saldo.

‘Nag-lie low’ suno sa iya si Paragan kag nagkadto sa Capiz matapos na-angut sa madamo nga mga kaso sa Negros may kaangtanan sa pagpang-ambush sa mga tropa sang gobyerno kag pagpatay sa mga miembro sang Armed Forces of the Philippines kag Citizen Armed Force Geographical Unit (CAFGU).

Si Paragan ang ginrekomendar sang Police Regional Office 7 nga malakip sa Directorate for Intelligence List of Wanted Persons.

Nalista man siya sa Joint Order CNN/ Terrorist Wanted Person sang Department of the Interior and Local Government kag Department of the National Defense (DILG-DND) kag gintanyag ang P1,050,000 nga padya sa iya pagkadakop.

‘NAGGAMIT SANG LAIN NGA NGALAN’

Hilway suno kay Bulalacao nga nagpangabuhi si Saldo sa Dumalag, Capiz sugod sang 2004.

Nag-obra man siya bilang kabulig sa isa ka negosyo sa amo nga lugar.

Gindakup sang mga pulis kag soldado si Saldo matapos gintudlo nga amo si Paragan sang bata sang anay rebelde nga sa idalum sang command sang natungdan.

‘NASAL-AN LANG’

Nagpanindugan si John Floyd Saldo, ni Baltasar Saldo, nga taga-Sto. Angel, Dumalag, Capiz gid sila.

Ginsaysay ni John Floyd nga Hunyo 23 sang gindakup ang iya amay bangud napabangdan nga commander sang NPA. Nakatawag pa si Saldo sa iya asawa kag ginhambalan nga dal-on sa Cuartero Police Station ang tanan nga papeles nga makapamatuod nga indi siya si Paragan.

Hunyo 24 sang aga, ginpresentar ni PRO 6 Director Bulalacao si Saldo sa media antes gindala sa Kabankalan nga origin sang warrants. Pero ginhilway suno kay John Lloyd ang iya amay sang Hunyo 24 sang hapon.

Paathag naman ni PRO 6 spokesperson Pol. Lt. Col. Joem Malong, gin-release si Saldo bangud suno sa prosecutor, dapat ilisan anay ang pangalan sa warrants of arrest sa kaso nga two counts sang murder kag two counts sang attempted murder. Nakabutang nga pangalan sa warrants ang Virgilio Paragan.

Updated as of June 26, 2019, 12NN/Aine Grace Bravo