Driver sang sports car nga nakabunggo patay sa mag-asawa nga Osano sa Diversion Road, ginhatagan tubtob Hulyo 8 agud magpa-athag – LTO 6

By: JoMaque | June 26, 2019, 12:18 AM
Via Aksyon Aljohn Torreta/Firingline

Iloilo City – Ginpasugtan na lang ni LTO 6 Director Roland Ramos ang 15 ka adlaw nga ginhingyo ni Mr. June Paul Valencia agud makahatag sang tul-id nga sabat sa show cause order kasunod sang pagkabunggo patay sa mag-asawa nga principal kag maestra sa Diversion Road, Mandurriao.

Suno kay LTO 6 spokesperson Riza Otayde, ginalauman nila ang explanation ni Valencia sa Hulyo 8.

Ginpahayag ni Otayde nga magadepende sa isumiter nga paathag ni Valencia kon bawion ni Director Ramos ang suspension sang iya driver’s license ukon i-cancel.

Una na ginpahayag ni Otayde nga ginpasugtan ni Ramos ang appeal nga time extension ni Valencia bangud sang humanitarian consideration, kasunod sang rason sang ulihi nga ara pa siya sa ‘stage of mental confusion’ agud maghatag sang detalyado nga pahayag angut sa insidente.

In the photo: Ang sulat ni June Paul Valencia kay LTO 6 Director Roland Ramos