2-bulan nga lapsag nga lalaki sa Banate, patay sang ginpahayag napilpilan sang iya amay; pamilya, nagapati nga ginkagat sang iwi-iwi ang bata

By: Aine Grace Bravo | June 27, 2019, 6:30PM

Via Aksyon Angel Mae Ciudad

Banate, Iloilo — Patay ang duha ka bulan nga lapsag matapos ginpahayag napilpilan sang iya amay sa Poblacion, Banate sang Hunyo 25.

Sa imbestigasyon ni Police Staff Sgt. Joelito Babayo sang Banate Police Station, gindala pa sang ginikanan sa Governor Niel D. Tupas Sr District Hospital sa Barotac Viejo ang bata pero gindeklarar sang doktor nga patay.

Nagtawag naman gilayon kay Babayo ang doktor nga nakilala kay Dr. Cruz matapos nagduda sa kamatayon sang lapsag.

Nakita suno sa iya sang doktor nga may anum ka pilas sa paa, mga lagub sa lawas, may dugo sa ilong kag baba ang lapsag.

Ginpahayag sang doktor suno kay Babayo nga posible naipit ang bata.

‘GINKAGAT SANG SAPAT’

Nagapati ang pamilya sang lapsag nga lalaki nga kagat sang sapat ang iya ginkapatay.

Suno sa amay nga si alyas Butsoy, may nakita nga duha ka nagatabiray nga iwi-iwi ang iya iloy sa idalum sang karton malapit sa ila ginatulugan.

Agi suno sa iya sang iwi-iwi ang anum ka mga pilas sang lapsag sa iya wala nga paa.

Imposible man suno kay Butsoy nga napilpilan niya ang bata bangud malayo ang iya puwesto sa lapsag nga ginahulid naman sang iya asawa.

 Alas 11 sang Hunyo 24 sang gab-i, ginpa-dede pa ni Butsoy ang lapsag antes siya nagguwa sa ila balay agud magtulog sa kilid sang baybay.

Las-kuwatro kahapon sang kaagahon, ginpahibalo si Butsoy nga wala na nagahibi ang iya bata gani ila gindala kay Banate Vice Mayor Dr. Joje Undar, pero naghambal ang doktor nga patay na ang lapsag.  

Ginpalantaw man nila sa doktor sa Barotac Viejo ang bata pero gindeklarar man nga patay.