PRO 6 Director John Bulalacao, nagretiro subong nga adlaw; PBGEN Rene Pamuspusan, nagbulos paagi sa turnover of command ceremony

By: Aine Grace Bravo | June 27, 2019, 6:30PM

Via Aksyon Dave Bucayan

Camp Delgado, Iloilo City — Nagretiro na si Police Regional Office Director Police Brigadier General John Bulalacao.

Nagbulos kay Bulalacao si Police Brigadier General Rene Pamuspusan, kasunod sang turnover of command ceremony sa Camp Delgado kaina sang hapon nga gin-officiate ni PNP Deputy Chief for Operations Police Lieutenant General Archie Francisco Gamboa.

Si Bulalacao, anay PNP spokesman, ang ika-33 nga PRO 6 Director sa sulod sang isa ka tuig kag 27 ka adlaw kag nagretiro kadungan sang iya kaadlawan subong.

Si Pamuspusan naman ang mistah ni Bulalacao sa PMA Maringal Class 1988 kag nagaselebrar man sang iya kaadlawan subong.

Si Pamuspusan ang tumandok sang Bantay, Ilocos Sur kag nakaserbe sa PRO 4A, PRO 1, PRO 8 kag National Capital Region.

Naka-agi siya assign sa National Support Units pareho sang CIDG kag Police Security and Protection Group; nakaserbe man sa Directorate for Operations, Directorate for Comptrollership kag Directorate for Police Community Relations sa Camp Crame kag sa PNP Command Group.

Antes nagbulos kay Bulalacao, si Pamuspusan ang Director sang PNP Headquarters Support Service.

Sang 2017, ginpasidunggan siya nga Best Senior Police Commissioned Officer ni anay PNP Chief kag Senator-elect Bato Dela Rosa.