Pamilya sang soldado nga napatay sa engkwetro, nagbiyahe pa-Negros matapos wala nagpasugot ang asawa nga ihamyang ini sa Leon, Iloilo; asawa, nagpa-athag naman kon ngaa nagbalibad sa hingyo sang pamilya sang iya bana

By: Aine Grace Bravo | June 28, 2019, 6:30PM

via Aksyon Hotline

Leon, Iloilo — Natalana ilubong sa Domingo, Hunyo 30, ang Ilonggo nga soldado nga napatay sa engkwentro sa tunga sang tropa sang gobyerno kag ginapatihan miembro sang New People’s Army sa Sitio Kambugtong, Barangay Bantolinao, Manjuyod, Negros Oriental.

Ini ang ginkunfirmar ni Lilibeth Cagape, manghod ni Corporal Leoter Cagape, nga tumandok sang Brgy. Tacuyong Norte, Leon.

Nagawangal kag nagalain ang buot sang pamilya Cagape bangud wala ginpahanugutan sang asawa sang soldado nga dal-on ang iya bangkay sa ila balay sa Leon.

Suno kay Lilibeth, naghingyo sila sa asawa nga si Hannah nga kun mahimo nila madala ang bangkay bisan duha lang ka adlaw sa ila balay bangud na-stroke ang ila iloy sang 2012 kag nabudlayan sa pagbyahe sang malawig.

Dugang diri, luyag man sang pamilya Cagape nga makita ang soldado sang mga himata, abyan ukon kakilala nila.

‘MAGASTOS’

Wala nagpahanugot ang asawa nga dal-on sang pamilya Cagape ang bangkay sang soldado bangud ginpahayag magastos.

Bisan nagpasalig na ang pamilya Cagape nga sila ang mabayad sang mga galastuhan sa pagtabok sa bangkay pakadto sa Iloilo, wala sa gihapon nagpasugot ang asawa.

Nagpangayo man sang bulig ang pamilya Cagape sa kilala nga military official para istoryahun ang asawa apang wala gihapon nagpasugot kag ginrason nga ginakahangaw-an niya nga maapektuhan ang lawas sang iya bana kun i-byahe.

Suno sa utod ni the late Corporal Cagape, nahamyang subong sa balkonahe sang balay sang tiya sang asawa sang soldado sa Toboso, Negros Occidental ang bangkay.

Ginatinguhaan pa sang Aksyon Radyo Iloilo nga makuhaan sang pahayag ang asawa.

May duha ka mga bata ang soldado kag iya asawa.

‘WALA AKO MAY MAHIMO’

Emosyonal ang 67-anyos nga amay ni the late Corporal Cagape matapos napaslawan nga mapapauli sa ila balay ang bangkay sang iya bata.

Suno kay Leovijildo Cagape, naghingyo siya sa asawa apang wala sang may mahimo bangud wala gid nagpahanugot.

Nagapakondisyon naman ang 68-anyos nga iloy sang soldado nga si Terry agud makabyahe pakadto sa Negros Occidental kag makita ang iya bata.

Ginapangitaan man sang pamaagi sang pamilya Cagape nga madala sa Negros Occidental ang tanan nga luyag magbisita sa hamyang sang soldado.

Si the late Corporal Cagape ang ika-pito sa walo nga mag-utod.

PAATHAG SANG ASAWA

Nagpa-athag si Mrs. Hannah Cagape, kun nga-a wala siya nagpasugot nga dal-un pa sa Leon, Iloilo ang bangkay sang iya bana.

Suno kay Hannah, wala gid sila sang conflict sang iya mga in-laws antes ang natabu sa iya bana.

Ginrason ni Hannah nga bloated na kag madasig mag-decompose ang bangkay sang iya bana kag posible maapektuhan pa gid kun ibiyahe pa halin sa Toboso, Negros Occidential sa diin ini subong ginahamyang pakadto sa Iloilo.

Ginpahayag ni Hannah nga wala nagtanyag ang pamilya sang iya bana nga sila ang magasto sa biyahe kundi ang commanding officer pa ang nagtawag kag nagpahibalo sa iya.

Nagpa-athag man siya kun ngaa sa balkonahe sang balay sang iya tiya ginhamyang ang bangkay sang bana.

Suno kay Hannah, mabudlay ang sitwasyon kun sa ila balay ibutang ang bangkay bangud higad gid ini sang karsada.

Dugang pa niya, antes sila nagbulagay sang pamilya sang iya bana matapos ginhikot ang bangkay, human na ang istoryahanay kag nagtanyag man siya sang ambulansiya ukon van para masakyan sang iloy nga si Terry sa pagbiyahe. Nakaagi stroke ang 68-anyos nga iloy.

Ginpasiguro man ni Hannah nga indi niya pagpabay-an ang mga himata sang bana nga nagbiyahe gid sang malayo para makita lang ang iya bangkay.