Nagadamo nga dengue cases, natalakay sa meeting ni Gov. Toto Defensor sa mga mayors, municipal health officers

By: Aine Grace Bravo | July 4, 2019, 6:30PM

Via Aksyon Mario Gelongo

Iloilo — Nagpakigsapol si Governor Arthur ‘Toto’ Defensor Jr sa mga mayors kag municipal health officers kasunod sang pagdamo sang kaso sang dengue sa probinsya.

Nahisugtan suno kay Defensor ang pagpaninlo sa mga barangay kada Sabado sugod sa Hulyo 6 agud masolusyunan ang problema.

Ipaathag suno sa iya sa barangay assembly ang mga tikang agud indi magdamo ang mga lamok nga nagadala sang dengue.

Base sa record sang Provincial Health Office halin Enero 1 tubtob Hunyo 28, naglab-ut na sa 3,897 ang kaso sang dengue nga may 18 ka patay.

May pinakamadamo nga kaso ang Pototan nga may 376 ka kaso, duha ang patay.

Sulod man sa Top 10 nga may pinakamadamo nga dengue cases ang Passi City nga may 317, isa ka patay; Calinog, 252; Concepcion, 214, apat ang patay; Cabatuan nga may 181, isa ang patay; Lambunao nga may 161, isa ang patay; Ajuy, 153; Carles, 132; Janiuay, 128 kag Sta. Barbara nga may 126 ka kaso kag isa ang patay.