Reklamo sa bahu sang mga basura sa MRF sang Iloilo Central Market, gin-aksyonan sang GSO

By: JoMaque | July 6, 2019, 9:53am
Via Firingline

Iloilo City – Gin-aksyonan sang General Services Office (GSO) ang reklamo sa naga-usbong nga bahu halin sa mga basura nga ginahaboy sa material recovery facility (MRF) sang Iloilo Central Market.

Suno kay Engr. Neil Ravena, chief sang Solid Waste Management Division sang GSO, ginpadulungan niya ang MRF kahapon matapos nabaton ang reklamo.

Nagbutang suno sa iya sang bulong agud mahagan-hagan ang bahu. Ginhatagan niya man sang bulong ang market-in-charge agud mamentinar ang katinlo sa MRF.

Gina-engganyo ni Engr. Ravena ang mga vendors nga ipatuman ang waste segregation kag magbulig agud mapabilin nga matinlo ang merkado kasunod sang nakita nga may mga ginahaboy nga basura nga indi kuntani pwede sa MRF.

Ginlaygayan naman ni Ravena ang market-in-charge nga bantayan sang maayo ang MRF kag dakpon ang mga nagahaboy nga indi taga-merkado.