Menor-de-edad nga naga-motorsiklo, nagbunggo sa puno sang kahoy sa Mandurriao

By: JoMaque | July 7, 2019, 8:35PM

Iloilo City – Gindala sa Western Visayas Medical Center si alyas Zyron, 17 sang Barangay Cag-an, Anilao kag nagatrabaho nga collector sang naga-deliver sang LPG tanks, sang naaksidente ang iya motorsiklo sa Rizal Street, Barangay Guzman-Jesena, Mandurriao malapit sa plaza kagab-i, Hulyo 6

May pilas sa tiil kag ulo ang solterito.

Sa pagpangusisa ni Police Staff Sergeant Jessie Cabial Jr sang Mandurriao Police Station, naglapaw sa karsada, nagbunggo sa puno sang kahoy antes nagtabog si Zyron. Nakita man nga nasang-it ang iya helmet sa kahoy.

Ginpahayag nga halin sa pagpanukot ang solterito kag pakadto na sa direksyon sang Mandurriao plaza sang naaksidente.