Kinder 2 pupil sa Mandurriao, patay sa dengue

By: Aine Grace Bravo | July 10, 2019, 6:30PM

via Aksyon KhenJo Terco

Iloilo City — Napatay sa dengue ang Kinder 2 pupil sang Hibao-an Elem School sang nagligad nga semana. 

Hunyo 28 sang ginhilanat ang bata, residente sang Hibao-an Sur, Mandurriao, gani ginpa-check up sang iya lola. 

Nagtahaw man ang hilanat sang bata sang naka-inom sang bulong rason nga nagkumpiyansa ang iya ginikanan. 

Nag-request pa sang laboratory test ang doktor nga ila ginpakonsultahan, pero wala napa-test ang bata bangud nagatrabaho ang iya iloy.. 

Hulyo 2, gindala sa Western Visayas Medical Center ang bata bangud nagreklamo sang pagpalanakit sang lawas kag nagapalanggit-um ang bibig.

Wala gilayon nabulong ang bata bangud sang kadamuon sang mga pasyente. Mga las siete sang gab-i sang Hulyo 2 na naplastar sa ward ang bata suno sa iya lola nga si Judith Fernandez. 

Gintinguhaan sang mga doktor nga mabulong ang bata pero malala na ang iya ginabatyag.

Napatay ang bata sang Hulyo 3 matapos nga gin-bleeding dugang pa sang lola. 

Posible suno sa pamilya nga sa eskwelahan nakutot sang lamok nga may dengue ang bata bangud sa ila pagkahibalo, wala na sang iban nga natapikan sang dengue sa ila lugar. 

‘NAGAPANINLO SA ESKWELAHAN’

Nanindugan ang principal sang Hibao-an Elementary School nga nagapaninlo sila. 

Suno kay Mrs. Lilibeth Taala, principal sang eskwelahan, nagapamutang sila sang larvicide sa mga areas nga may tubig kag may mga ginikanan nga nagapaninlo antes magsugod ang mga klase kada adlaw.

Magluwas sini, nag-request man si Mrs. Taala sa mga ginikanan nga mag-conduct sang ‘Do-Day’ kag na-schedule ang ila pagpaninlo kada hapon.