PECO, wala sang business permit sang duha na ka tuig suno sa BPLO head

By: Aine Grace Bravo | July 10, 2019, 6:30PM

via Aksyon Hotline

Iloilo City — Ginkumpirmar ni Business Permits and Licensing Office (BPLO) Head Norman Tabud nga wala siya naka-issue sang business permit sa Panay Electric Company (PECO) subong nga tuig. 

Masobra na duha ka tuig suno sa iya nga wala ma-isyuhan sang business permit ang PECO bangud wala ma-isyuhan sang business clearance sang City Treasurer’s Office. 

Ang business clearance, isa sa mga requirements para sa renewal sang business permit suno kay Tabud.

Ginpahayag ni Tabud nga sang Enero, nagsulat sa iya ang City Treasurer nga nagahingyo nga i-hold ang pag-issue sang business permit sa PECO bangud napaslawan ini nga mag-secure sang Real Property Tax (RPT) clearance.

Sa pagkahibalo ni Tabud, wala naka-secure sang RPT clearance ang PECO bangud may balayran pa ang kompaniya sa ila taxes sa mga poste kag mga linya sang kuryente nga dapat sukton sang city government.

Ginbanta ni Tabud sa P89 million ang balayran nga RPT sang PECO sa city government.

NOTICE OF VIOLATION 

Ginpadal-an sang notice of violation sang BPLO ang PECO matapos wala naka-secure sang business permit ang kompaniya.

Suno kay Tabud, Marso 12 sang nagpadala siya sang notice of violation sa PECO. 

Pero nagsabat suno sa iya ang PECO nga naka-comply sila sang mga basic requirements kag “paid under protest” suno sa kompaniya ang ila balayran sa syudad.

Ginpahayag ni Tabud nga nag-apelar ang PECO sa Local Board on Assessment and Appeals kag nag-file man sang kaso sa Regional Trial Court angut sa ginasukot sang city government. 

Gin-endorse naman ni Tabud sa City Legal Office ang sabat sang PECO sa ila notice of violation.