Capiz, nagdeklarar sang dengue outbreak bangud sa padayon nga pagdamo sang kaso sang dengue
By: Aine Grace Bravo | July 13, 2019, 6:30PM
via KKK Information Center
Capiz — Gindeklarar ni Capiz Governor Esteban Evan Contreras ang dengue outbreak bangud sa padayon nga pagtaas sang kaso sang dengue sa bilog nga probinsya.
Sa Executive Order Number 1 nga gin-issue sang gobernador kahapon, Hulyo 12, ginmandu niya ang paghatag sang libre nga medical services sa mga dengue patients sa tanan nga provincial kag district hospitals.
Ginamanduan man ang tanan nga local government units sa probinsya nga magpatuman sang preventive kag control mechanisms sa ila tagsa ka areas of jurisdictions pareho sang pag-conduct sang “Kontra Dengue Day” sa tanan nga barangay sugod subong nga adlaw kag sa kada Sabado sa sulod sang walo ka semana; pagtukod sang committees, task forces nga amu ang magapanguna sa intensive campaign kag pagpasangkad sang implementasyon sang Aksyon Barangay Kontra Dengue; enhanced 4S strategy kag 4 o’clock habit.
Nalakip man ang masangkad nga information, education and communication campaigns sa publiko kag sa komunidad paagi sa available mass media platforms.
Base sa record sang Capiz Epidemiological Surveillance and Response Unit (CESRU), naka-record ang probinsya sang 2,177 ka dengue cases kag may 14 ka napatay halin Enero 1 tubtub Hunyo 29 subong nga tuig.