Dengue patients, nagasolobra sa mga district hospitals; private hospitals sa syudad, ginpangayuan bulig ni Gov. Defensor nga mag-akomodar sang mga pasyente halin sa kabanwahanan

By: Aine Grace Bravo | July 13, 2019
Via Aksyon Francisco Elbanbuena/PIO Capitol

Iloilo City – Nagpasalig ang mga private hospitals sa syudad nga batunon ang mga dengue patients halin sa kabanwahanan.

Nahisugtan ini sa meeting ni Gov. Toto Defensor sa mga administrators kag directors sang tanan nga private hospitals sa Iloilo City kaina.

Suno kay Defensor, iga-cover sang Philhealth ang mga pigado nga pasyente. Kon magsobra sa package sang Philhealth ang bill, magahatag sang bulig ang provincial kag national government.

Nagtambung sa meeting sanday Sr. Arcelita Sarnillo kag Dr. Henry Gonzales sang St. Paul’s Hospital; Dr. Elmer Pedregosa sang Iloilo Mission Hospital; Dr. Ludovico Jurao kag Elmie Jude Labarejos sang Iloilo Doctor’s Hospital; Mr. Edwin Magsino, Dr. James Woo kag Mr. Argie Arenga sang QualiMed Hospital – Iloilo; Dr. Danilo Encarnacion kag Dr. Ray Alindong sang Metro Iloilo Hospital and Medical Center; Mr. Joaquin Sapul, Jr. sang The Medical City – Iloilo; kag Mr. Johnny Tolentino kag Mr. Mark Lester Opiña sang Medicus Medical Center.

Base sa data sang Hospital Management Office sang Provincial Government, nagalab-ut na sa 851 ang dengue patients nga na-admit sa 12 ka district hospitals, may pagsaka nga 231 halin sa 610 nga pasyente sang Hulyo 1.

Nag-request man si Gov. Defensor sang mga tolda sa Philippine Red Cross para sa mga district hospitals.

Sa paglibot sang gobernador sa mga district hospitals, ginhimo na nga dengue ward ang iban nga private rooms, pero may nagahigda nga mga pasyente bisan sa mga alagyan.

Nagakinahanglan man sang dugang nga health personnel ang provincial government suno kay Defensor bangud madamo ang gina-admit nga may dengue kada adlaw.