Bulong, espasyo kag kakulang sang manpower, problema sang mga district hospitals sa Iloilo province sa nagadamo nga dengue cases

By: Aine Grace Bravo | July 15, 2019, 7:00PM

via Aksyon Hotline

Iloilo — May tatlo ka concerns nga ginatutukan ang Iloilo Provincial Government sa pag-atubang sa problema sang nagadamo pa gid nga mga dengue patients nga nagasulobra na sa mga district hospitals sa probinsiya.

Suno kay Governor Arthur Defensor Jr, lakip sa mga concerns nga ini ang bulong, space kag manpower.

Sa paglibot ni Dr, Cynthia Cabangal-Ng, nagapamuno sang Hospital Management Office (HMO) sang provincial government sa mga district hospitals tubtob kahapon, Hulyo 14, nagalab-ut na sa 998 ang mga pasyente ukon average nga 25-30 ka pasyente nga nagasulod sa mga ospital kada adlaw.

Sa data lang halin Miyerkules tubtob Huwebes sang nagligad nga semana, may masobra 20 ka pasyente ang gin-admit samtang 30 naman ang pasyente ang gin-admit halin Huwebes tubtob Biyernes.

BULONG

Ginpahayag ni Defensor nga naka-abot na sang nagligad nga semana ang IV fluid supplies nga ginbakal sang nagligad pa nga administrasyon. Mapun-an sini suno kay Defensor ang kinahanglanon sang mga ospital sa subong.

Manog – abot naman subong nga semana ang dugang nga mga supplies nga gin -” emergency purchase” sang probinsya.

Suno sa gobernador, ginahanda naman nila ang budget para sa masunod nga kinahanglanon nga bulong.

Nagapangita pa gid sila sang puwede makuhaan sang dugang nga pondo pero kun wala na gid, ikasa suno kay Defensor ang deklarasyon sang state of calamity agud ma-access ang calamity fund.

Kun may bakuna kontra dengue, ginpahayag ni Defensor nga iduso man niya ini pero ang pamangkot subong suno sa iya kun may husto na nga dengue vaccine.

SPACE

Nagapreparar na ang provincial government sang tents ukon tolda nga mahimo gamiton pananglitan mag-alawas na gid ang mga dengue patients sa mga ospital.

Suno kay Defensor, sang nagligad pa nga semana napreparar ang mga tents kag may mga partner institutions pa gid nga handa man magpahulam.

Sa subong may mga pasyente nga ara sa hallways sang mga ospital kag ginapreparar man ang mga quarters sang mga “hospital personnel” pati ang mga chapel nga puwede butangan sang mga pasyente kun kinahanglanon.

Sang damlag lang nagsapol si Defensor sa mga private hospital administrators nga naghatag sang ila commitment nga magbaton sang magsobra nga mga pasyente sa 12 ka mga district hospitals sa probinsiya.

Mas maayo suno kay Defensor kun may referral halin sa district hospital kun magpa-admit sa private hospital.

Kun magdiretso gid man sa pribado nga ospital, masarangan gihapon ini sang mga pasyente sa bulig sang PhilHealth.

MANPOWER

Gin-ako ni Defensor nga ginakulang na ang mga nurses, doctors kag iban pa nga mga personnel sa mga ospital.

Ini ang rason kun ngaa gindeploy sang Department of Health 6 ang mga nurses kag doktor nila nga na-assign sa nagkalain-lain nga banwa, sa mga district hospitals agud magbulig sa mga pasyente.

Magasugod naman ang provincial government sa pag-hire sang contractual personnel para sa kampanya kontra dengue.

May mga private partners man suno kay Defensor nga nag-signify nga mabulig kun magdaku pa gid ang emerhensiya.

Sa pagbato sa dengue, ginpahayag sang gobernador nga importante gihapon ang pagpaninlo sang panimalay kag palibot.