Iloilo City Councilor Ely Estante, 2 menor-de-edad nga bata ni Maasin Mayor Francis Amboy, confine sa ospital bangud sa dengue

By: Aine Grace Bravo | July 16, 2019, 8PM

via Aksyon Hotline

Iloilo City — Na-confine sa ospital si Councilor Ely Estante bangud sang dengue.

Suno sa konsehal, gindala siya kagab-i sa ospital matapos nagbalik-balik ang iya hilanat kag nagtuhaw ang mga rashes sa iya lawas.

Nagpanugyan suno sa iya ang doktor nga magpaidalum siya sa CBC exam kag nahibaluan nga manubo sa normal level ang iya platelet count tubtub na-diagnose nga positibo siya sa dengue.

Gin-ako sang konsehal nga Biernes pa nagalain ang iya pamatyag pero ginbalewala niya lang sa pagpati nga simple lang ini nga trangkaso.

Sa subong, wala sang may ginatomar nga bulong si Estante, pero nagpabutang siya sang IV fluid kag ginpanugyanan sang doktor nga mag-inom sang madamu nga tubig para ma-hydrate ang iya lawas kag magbalik sa normal ang iya platelet count.

Na-confine man sa ospital sa syudad sang Iloilo ang duha ka bata nga babaye ni Maasin Mayor Francis Amboy matapos nag-positibo sa dengue.

Suno sa alkalde, gindala kahapon sa ospital ang iya mga bata nga naga-edad sang 13 kag pito ka tuig.

Indi naman maathag kon diin nakuha sang mga bata ni Amboy ang amu nga balatian.