Ice cream vendor, gin-anod sang tubig sang nagpanguha sang kalampay sa suba sa Pavia; 2 oras nga nag-utaw-utaw sa flood control antes na-rescue

By: JoMaque | July 18, 2019, 8:46am

Iloilo City — Estable na ang kondisyon sang 30 anyos nga ice cream vendor sang gin-anod sang tubig sa flood control halin sa Tigum, Pavia tubtob Buhang, Jaro kahapon, July 17.

Ginkilala ang lalaki kay Bryan Gagante nga residente sang Anilao, Pavia.

Sang interview sang Aksyon Radyo reporter kay Gagante, ginpahayag niya nga naglusong siya sa suba upod sa iya duha ka abyan agud magpangalampay, pero gin-anod siya sang mabaskog nga daludo sang tubig mga alas-dos sang hapon.

Masobra duha ka oras siya nga nagpautaw-utaw nga nagahakus sa daku nga puno samtang gina-anod sang tubig.

Na-rescue si Gagante sang rescue team sang Bureau of Fire Protection kag Jaro Police Station sa idalum sang taytay sa Buhang, Jaro pasado alas-4 sang hapon.

Gin-aku niya nga naka-inom siya antes gin-anod.

Yara gihapon sa ospital ang lalaki pero natalana na nga magpauli sa ila balay.