Patrolman assign sa Pototan Police Station, ginreklamo nga nag-inom, nagpamahug sa iya hepe kag nagpalupok sang pusil

By: Aine Grace Bravo | July 18, 2019, 9PM

via BBB

Pototan, Iloilo — Nag-inom, nanghangkat sang inaway, nagpamahug sa iya hepe kag nagpalupok sang pusil si Patrolman Joerick Ace Ilisan sang Pototan Police Station.

Suno kay Police Major Ronnie Brillo, nadakpan sang inspecting team halin sa Police Regional Office 6 nga naga-inom sanday Ilisan kag Police Corporal Esil Peñarubia sa ila advance command post pasado alas-dose kaina sang kaagahon.

Natabuan nga nagkadto si Brillo sa hamyang sang napatay nga pulis sa Barangay Lumbo, Pototan kag ginpahibalo lang siya sang team leader sang inspecting team gani nagbalik siya sa police station.

Pero sang nag-abot siya sa estasyunan, ginpahayag nga nanghangkat sang tiruhay si Ilisan.

Makapila ka beses man suno kay Brillo nga nagtuyo si Ilisan nga magsulod sa iya opisina, pero ginpunggan ini sang iban nga mga pulis.

Nakita ni Brillo nga nagkadto si Ilisan sa HI-PAD antes nabatian ang lupok sang pusil.

Nagpangayo sang bulig si Brillo sa IPPO SWAT nga madasig man nagresponder kag gindakup si Ilisan.

Napasaka na ang kaso kriminal batuk kay Ilisan samtang ginapreparar ang kaso administratibo batuk sa ila ni Peñarubia.

Nagpadulong naman si PRO 6 Director Police Brigadier General Rene Pamuspusan sa Pototan Police Station kaina sang hapon kag iya ginmandu ang pag-imbestigar sa natabu, lakip na ang posible nga salabton sang iban pa nga on-duty nga pulis nga wala sang ginhimo samtang naga-inom ang duha ka pulis.

Suno kay Pamuspusan, indi niya pagtolerahon ang kasubong nga aktwasyon.