ArchivesLokal

Hepe sang Pototan MPS Station, nagalikaw maglala ang sitwayon rason wala gilayon ginpadakup ang pulis nga nanghangkat sang tiruhay

By: Aine Grace Bravo | July 19, 2019

via Aksyon Hotline

Pototan, Iloilo — Nagpa-athag si Police Major Ronnie Brillo kun nga-a wala niya gilayon ginpa-aresto ang patrolman nga nagpanghangkat sa iya tiruhay kag nagpalupok pa sang pusil sang Hulyo 18 sang kaagahon.

Naka-inom si Patrolman Joerick Ace Ilisan sang nanghangkat inaway sa iya hepe.

Antes ang insidente, ginsaysay ni Brillo nga nadakpan si Ilisan upod kay Corporal Esil Peñarubia sang inspection team halin sa Police Regional Office 6 sa pagpanguna ni Major Nasser Canja nga naga-inom sa command post sa gate sang police station.

Nakita pa ni Canja nga ginhaboy sang mga pulis kag ginpalapaw sa berha sang command post ang botelya sang ilimnon.

Gintawgan si Brillo nga yara sang amo nga tiun sa hamyang sang pulis nga napatay.

Gilayon man nagbalik si Brillo sa police station. Naglakat suno sa iya si Canja kag gintugyan sa iya ang paghimo sang report.

Sang nakalakat si Canja, gin-akigan ni Brillo ang duha ka pulis. 

Ginpahayag ni Brillo nga husto nga hambalanon ang ginpangbuy-an niya sa duha ka pulis kag kun indi sila hubog, indi sila maakig sang iya ginhambalan.

Nagpahimuyong lang sa opisina si Peñarubia suno kay Brillo samtang si Ilisan nagsinggitan kag nanghangkat sa iya tiruhay.

Nagapinitla pa suno sa iya ang duha ka pulis samtang nagahambal.

Suno kay Brillo, sa Highway Police Assistance Desk (HIPAD) sa F. Parcon St. na-assign si Ilisan kag posible nga nanulong sang inom sa command post.

Nagtuyo pa magsulod sa barracks si Ilisan samtang nagapanghangkat sang inaway.

Ginasaway si Ilisan sang kaupod niya nga mga pulis pero wala nagapamati.

Nagbalik sa HIPAD si Ilisan kag nagpalupok sang pusil.

Ginpahayag ni Brillo nga wala niya ginpatulan si Ilisan kag wala niya man ginsupo bangud posible suno sa iya nga magtiniruhay sila sang iban pa nga pulis ilabe na kun ginmandu niya nga arestuhon ini.

Nagtawag si Brillo sa IPPO-SWAT. Pag-abot sang SWAT, gin-istorya sila ni Brillo nga arestuhon si Ilisan nga wala lang sang gamo kag likawan ang tiniruhay.

Nakuha si Ilisan sa ila balay.

Gin-aresto kag ginpreso si Ilisan samtang gin-custody naman si Peñarubia.

Ginpasakaan na kahapon ni Brillo si Ilisan sang criminal cases nga grave threat (bangud sa pagpahog sa iya nga patyon siya), alarm and scandal kag illegal discharge of firearm.

Sa administrative case naman, ipasaka ni Brillo batok kanday Ilisan kag Peñarubia ang less grave misconduct bangud sa ila pag-inom kag conduct unbecoming of a police officer kag grave misconduct batok kay Ilisan bangud sa tuyo nga pagsulod sa iya opisina.

Suno kay Brillo, ginkasuhan man sadto si Ilisan sang simple misconduct.

Walo ka tuig na sa police service si Ilisan.