(UPDATE) Police Major Ronnie Brillo sang Pototan MPS, nanginwala nga ginsumbag niya sa dughan si Patrolman Joerick Ace Ilisan nga nanghangkat sang tiruhay kag nagpalupok sang pusil

By: Aine Grace Bravo | July 20, 2019, 7:50PM

via Aksyon Hotline

Pototan, Iloilo — Ginpanginwala ni Police Major Ronnie Brillo, hepe sang Pototan Police Station, nga ginsumbag niya sa dughan si Patrolman Joerick Ace Ilisan matapos ini nadakpan upod kay Police Corporal Esil Peñarubia nga naga-inom bisan naga-duty sang Hulyo 18 sang kaagahon.

Suno kay Brillo, justification na lang ni Ilisan ang paglain sang iya bu-ot agud malutsan ang ginhimo niya nga katontohan.

Wala man sang kamatuoran suno sa iya ang impormasyon nga may naga-inom nga pulis sa kamalig malapit sa police station.

Sa interview sang Aksyon Radyo sa live-in partner ni Iilisan, nagpauli suno sa iya ang pulis matapos ginsumbag ni Brillo sang tuyo kuntani siya magpaathag.

Nadakpan sang inspection team halin sa Police Regional Office 6 nga naga-inom sanday Ilisan kag Peñarubia rason nga gin-akigan sila ni Brillo.

Nagpahimunong sa opisina si Peñarubia, pero nanghangkat suno kay Brillo si Ilisan sang tiruhay kag nagpalupok pa sang iya service firearm.

Nagapabilin nga preso si Ilisan sa Pototan Police Station kag napasakaan na ni Brillo sang kaso kriminal, samtang ginapreparar ang kaso administratibo batuk sa ila ni Peñarubia.