15-anyos nga driver sang motorsiklo, patay matapos nabungguan sang motorsiklo sa Concepcion, Iloilo

By: JoMaque | Hulyo 22, 2019, 9am
Via Aksyon Trainee Reporter Farrah Mae Morano

Concepcion — Patay ang 15-anyos nga dalagita matapos nabungguan ang ginamaneho niya nga motorsiklo sang isa pa ka motorsiklo sa Barangay Bacjawan Sur, pasado las otso kahapon sang aga, Hulyo 21.

Suno kay Police Major Jonah Galicha, hepe sang Concepcion Police Station, gindala pa sa ospital si alyas Jo apang napatay bangud sang pilas sa ulo kag lawas.

Halin sa Poblacion ang motorsiklo nga ginamaneho ni Jo sang hinali lang siya nabungguan sang nagasugata nga motorsiklo nga ginamaneho naman sang 15-anyos nga solterito nga si alyas Art.

Naga-angkas sa motorsiklo ni Art ang iya 15-anyos man nga pakaisa nga si alyas Cel sang Barangay Aglosong, Concepcion.

Sa inisyal nga imbestigasyon sang pulis, nagtabog sa iya motorsiklo si Jo kag nalab-ot pa ang iya tiil sang isa pa gid ka motorsiklo nga ginamaneho naman ni Dan Azusana.

Ginturn-over sa Women and Children’s Protection Desk sa Concepcion si Art.

Ginkustodiya naman si Azusana sa Concepcion Police Station.