Probinsya sang Iloilo, nagapabilin nga may pinakadamo nga kaso sang dengue sa Western Visayas — DOH 6

By: JoMaque | July 23, 2019, 10:50am
Via: DOH 6 PRESSCON

Iloilo City— Nagapabilin gihapon ang probinsya sang Iloilo nga may pinakamadamo nga kaso sang dengue sa Western Visayas.

Base sa pinakaulihi nga record sang Department of Health (DOH) 6, halin January 1 tubtob July 13, 2019, naglab-ot na sa 18,834 ang kaso sang dengue sa rehiyon.

May pinakamadamo nga kaso ang probinsya sang Iloilo nga may 6,472; ikaduha ang Negros Occidental nga may 3,639; kag pangatlo ang Capiz nga may 3,139.

Halin January 1 tubtob July 13, naglab-ot na sa 94 ang patay sa Western Visayas bangud sa dengue.

‘HYDRATION UNIT’

Ginmandu naman sang DOH 6 sang nagligad nga semana sa mga Rural Health Units sa mga probinsya nga magserbe nga Hydration Unit sa mga pasyente.

Diri gina-hydrate sang anum tubtob walo ka oras ang mga pasyente nga may dengue.

Ginpahayag man ni Dr. Rosemarie Lamirez, Medical Coordinator sang DOH 6, nga nagtukod na sila sang monitoring team sa rehiyon nga amo ang maga-evaluate sang status sang dengue outbreak sa kada probinsya.

Una nga i-monitor suno kay Dr. Lamirez ang mga probinsya nga may mataas nga kaso sang dengue.

Naka-coordinate naman ang DOH-6 suno kay Dr. Convocar sa iban pa nga ahensya sang gobyerno pareho sang AFP, BFP, DSWD, kag iban pa agud magbulig sa ila mga operasyon sa pagtapna sang dengue sa rehiyon.

About Post Author

Aksyon Radyo Iloilo 720Khz

admin@aksyonradyoiloilo.com.ph

http://aksyonradyoiloilo.com.ph

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %