Bag-o nga Esplanade sa Muelle Loney, City Proper, inagurahan buwas

By: Aine Grace Bravo | July 26, 2019

Via Iloilo City Government

Iloilo City — Inagurahan ang bag-o nga Esplanade sa Muelle Loney, City Proper buwas.

Mangin bisita sa programa sanday Senador Franklin Drilon, Mayor Jerry Treñas kag DPWH 6 Director Lea Delfinado.

Natapos na sang mga personnel sang Iloilo City Beautification Program ang landscaping sa bag-o nga Esplanade paagi sa pagtanum sang mga kahoy kag ornamental plants.

Magluwas sa pagpatahum, tuyo man sa pagpangtanum ang pagpahagan-hagan sang epekto sang climate change.

Ang Esplanade sa kilid sang Iloilo River ang nagalaba na subong sang pito ka kilometro kag ginkilala nga Haligi ng Dangal awardee para sa Best Landscape Architecture sang National Commission for Culture and the Arts paagi sa National Committee on Architecture and the Allied Arts.