343 tanan ka PCSO outlets sa Western Visayas, ginsiraduhan sang PRO 6 kasunod sang mandu ni Presidente Rodrigo Duterte
By: Aine Grace Bravo | July 29, 2019
via Aksyon Hotline
Camp Delgado — Napatuman sang Police Regional Office 6 ang 100 percent closure sa tanan nga gaming outlets sang Philippine Charity Sweepstakes Office sa Western Visayas.
Suno kay PRO 6 Spokesperson PLTCOL Joem Malong, base sa report sang ila Operations Division, 343 ka mga PCSO outlets ang napasiraduhan halin sang ginmandu ni Presidente Rodrigo Duterte ang pag-untat sang gaming operations sang PCSO sang Sabado, Hulyo 27.
Sa amo nga numero, 283 ang lotto outlets kag 60 ang Keno.
Kadam-an suno kay Malong ang boluntaryo nga nagpanirado.
Pero ginbuyagyag ni Malong nga may nadakpan pa sila nga nagapataya sang Sabado.
Ginpasiguro ni Malong nga pabaskugon sang PRO 6 ang kampanya kontra illegal nga pasugal kag pangdakpon ang mga nagapataya.