4 department heads sa City hall, gin-akigan ni Mayor Jerry Treñas
By: Aine Grace Bravo | July 29, 2019
via BBB
Iloilo City — Gin-akigan ni Mayor Jerry Treñas ang head sang apat ka opisina sa City Hall sa flag ceremony kaina sang aga.
Suno sa alkalde, indi na niya ma-tolerar ang ginahimo sang apat ka opisina.
Sa City Engineer’s Office, ginpahayag sang alkalde nga mabudlay magkuha sang building kag occupancy permits sa amo opisina. Madamo suno sa iya nga buildings nga wala pa sang occupancy permit bangud ginapabudlayan.
Ginpahayag ni Treñas nga mahimo na makakadto sa City Hall ang mga building owners bangud bag-o na ang City Engineer.
Sa Zoning Office naman, ginapabudlayan suno sa iya ang mga investors.. Madamo ang bodega sa coastal road suno sa alkalde pero wala gid gin-rekomendar sang opisina nga i-classify nga industrial-commercial halin sa residential ang lugar.
May nagreklamo naman sa alkalde sa ginahimo sang Civil Registrar nga wala na sang tree planting kag seminar para sa mga manug-pakasal kon magbayad sang P8,000.
Naakig man si Treñas sang ginpamatukan ni CSWDO head Gene Garingalao ang pagsaylo sang financial assistance sa Mayor’s Office.