7-tuig nga bata sa Sto. Niño Norte, Arevalo, napatay bangud sa dengue; iloy, nagreklamo nga napabay-an ang iya bata

By: Aine Grace Bravo | July 29, 2019

via Aksyon KhenJo Terco

Napatay bangud sa dengue ang pito ka tuig nga bata nga babaye sa Sto. Niño Norte, Arevalo kahapon, Hulyo 28.

Suno sa iloy sang bata nga si Ramelyn Generale, naglain ang pamatyag sang iya bata sang Hulyo 22 (Lunes) gani wala niya ginpa-eskwela pagkahapon.

Hulyo 23 (Martes) iya ginpa-check up ang bata sa health center sa Arevalo bangud nagasuluka. Sang gin-test ang bata, nakumpirmar nga may dengue. Ginhatagan sang referral sang doktor nga ila ginpakonsultahan ang iloy agud nga mapa-admit sa ospital ang bata.

Gindala sa Western Visayas Medical Center ang bata para nga ma-admit.

Natingala ang iloy nga sang na-admit na ang bata, wala gina-check ang iya dugo agud ma-monitor ang platelet count.

Wala na namangkot pa ang iloy sa doktor bangud nagsalig siya nga ara na sa ospital ang bata kag may salig siya nga obligaron sang doktor ang pasyente.

Halin Martes tubtob Biyernes, Hulyo 26 nga na-admit, wala gid nakuhaan sang blood sample ang bata suno sa iloy. Ginakamusta lang sila ka doktor suno sa iloy kag ginapamangkot kun nagasuka pa ang bata.

Nakibot ang iloy nga ginhambalan sila sang doktor nga pwede na sila makapauli sang Biernes bisan mataas pa ang hilanat sang bata.

‘WALA GIN-DISCHARGE’

Wala naman ginpasugtan sang nagbulos nga doktor nga makapauli ang pasyente. Nag-request suno sa iloy ang nagbulos nga doktor nga i-test ang dugo sang bata. Ini ang pinakauna nga kahigayunan nga na-test ang dugo sang bata halin sang na-admit kag naguwa sa resulta nga positibo sa dengue ang bata.

Hulyo 27 (Sabado) nag-kritikal ang bata suno sa iloy bangud indi na makaginhawa sang maayo.

Hulyo 28 (Domingo) sang hapon, ginbutangan sang tubo ang lawas sang bata kag gin-ambu bag apang pagkaligad sang mga 15 minutos suno sa iloy, napatay ang bata.

Ginatinguhaan pa sang Aksyon Radyo Iloilo nga makuhaan sang statement ang ospital angut diri.