EO 146 nga nagamandu sang mandatory closure sa mga establisemento nga nagaserbe sang ilimnon pag-abot alas-2 sa kaagahon, ginbawi ni Mayor Jerry Treñas

By: Aine Grace Bravo | August 2, 2019

via BBB

Iloilo City — Ginbawi na ni Mayor Jerry Treñas ang Executive Order 146 nga nagamandu sang mandatory closure sang mga bars, night clubs, disco bars, resto bars kag kasubong nga establishmento nga nagaserbe sang makahulubog nga ilimnon pag-abot sang las dos sang kaagahon.

Nagakahulugan nga puwede na magpa-aga ang mga naga-inom sa tiun maka-issue sang papel ang alkalde.

Suno kay Mayor Treñas, pinal na ang iya desisyon kag ginahulat na lang niya ang draft nga ginpahimo niya sa City Legal Office para maghimo sang EO nga naga-repeal sang EO 146.

Ang EO 146 ginpagguwa sa panahon ni anay Mayor Joe Espinosa.

Ginpahayag ni Treñas nga nagpasalig ang kapulisan sa siyudad nga masarangan nila mamentinar ang peace and order bisan indi na paglimitahan ang mga bars kag kasubong nga mga establishmento.

Hugot man nga magapatuman sang one-strike policy kag i-revoke ang lisensiya sang mga establishmento nga indi makatuman sa guidelines nga ila ginsugtan suno kay Treñas.