3 pumpboats, nagkulob sa Guimaras Strait; 11 kumpirmado nga patay
By: Aine Grace Bravo | August 3, 2019
Iloilo — Tatlo ka pumpboats ang nagkulob sa Guimaras Strait kaina sang hapon.
Una nga nagkulob pasado alas-12 sang hapon ang MB Chi-Chi kag MB Keziah nga halin sa Parola Wharf kag pakadto sa Jordan, Guimaras
10 ka mga sakay sang MB Chi-Chi ang kumpirmado nga nagkalamatay.
Nagasundanay ang MB Chi-Chi kag MB Keziah pakadtu sa Jordan sang gulpi lang naabtan sang pugada sa tunga sang lawod.
Suno kay alyas Toto, 19 anyos sang Guimaras, 43 sila nga pasahero sang MB Chi-Chi sang gulpi lang naghangin sang mabaskog kag nagkulob ang ila sakayan.
Ginpahayag naman ni alyas Fred nga nautod ang banting sang trapal sang pumpboat.
Base sa manifesto sang Coast Guard-Iloilo, 43 ang sakay sang MB Chi-Chi.
Sa nasambit nga numero, 23 ka survivors sang MB Chi-Chi ang gindala sa City Mall. Ginkumpirmar naman ni Nueva Valencia, Guimaras Mayor Emmanuel Galila nga may 11 ka na-rescue nga yara subong sa Jordan samtang tatlo naman ang yara sa Buenavista.
Wala naman sang pasahero ang MB Keziah kag naka-survive ang apat ka crew.
Pasado alas-tres sang hapon, nagkulob naman ang MB Jenny Vince nga halin sa Buenavista Wharf pakadto Parola.
Sa manifesto sang Coast Guard, 36 ang pasahero kag tatlo ang crew sang MB Jenny Vince. 26 diri ang na-rescue lakip ang tatlo ka crew, samtang nagapadayon ang rescue operations.
May isa ka pasahero sang MB Jenny Vince ang kumpirmado nga napatay.
Pasado alas-5 sang hapon, tatlo ka gindala sa Iloilo Saint Paul’s Hospital ang napatay. Wala pa nahibaluan kon diin nga pumpboat nakasakay ang mga casualties nga gindala sa nasambit nga ospital.
Sa pinaka-ulihi nga impormasyon halin kay Guimaras Governor Samuel Gumarin, nagpabudlay sa search and rescue operation ang malain nga panahon.
Nagpasalamat ang gobernador sa tanan nga nagbulig sa pag-rescue sa mga pasahero.
Nagalaum ang gobernador nga makita ang iban pa nga missing.
Ginkanselar ni Iloilo City Mayor Jerry Treñas ang biyahe sang tanan nga pumpboats pakadto sa Guimaras kasunod sang natabu.