(UPDATE) 28 patay sa Iloilo Strait Tragedy; 5 pa, missing

By: Aine Grace Bravo | August 5, 2019

Iloilo City — Nadugangan pa ang mga napatay sa Iloilo-Guimaras Strait tragedy sang Agosto 3.

Ginkumpirmar ni Commodore Allan dela Vega, acting district commander sang Philippine Coast Guard Western Visayas, nga base sa ila record, 28 ang mga napatay.

Nagdugang sa casualties ang na-retrieve nga bangkay sang lalaki sa Bondolan point sa Jordan, Guimaras kaina sang aga.

Kahapon sang hapon, duha man ka bangkay ang na-retrieve.

Lima ang missing kag 53 ang survivors sa trahedya.

Sa 86 nga kabug-usan nga numero sang pasahero sang MB Chi-Chi kag MB Jenny Vince, 75 ang yara sa manifesto samtang 11 ang wala nalista.

Wala naman sang pasahero ang nagkulob man nga MB Keziah pero nakaluwas ang tatlo ka crew.

Una na ginpahayag ni  Guimaras Governor Samuel Gumarin nga magahatag ang Provincial Government sang P50,000 nga bulig pinansyal sa kada pamilya nga napatyan.

Abagahon man suno sa iya sang Provincial Government ang mga balayran sa ospital sang mga naka-survive kag balayran sa punerarya sang mga napatay.