Maritime Casualty Investigation sang Phil. Coast Guard sa pagkulob sang 3 pumpboats sa Iloilo Strait, nagsugod na

By: JoMaque | August 6, 2019

Iloilo City — Nagasugod na ang Maritime Casualty Investigation sang Philippine Coast Guard sa pagkulob sang tatlo ka pumpboats sa Iloilo-Guimaras Strait sang Agosto 3 sang hapon.       

Ginkumpirmar ni Coast Guard Western Visayas District Director Commodore Allan Victor Dela Vega nga nakaabot na ang team halin sa ila national headquarters agud mag-imbestigar.

Pero sa impormasyon nga natipon ni Dela Vega, nagkulob ang MB Chi-Chi, MB Keziah kag MB Jenny Vince bangud sa pugada.

Padalman sang team suno kay Dela Vega kon ano gid ang pinakarason sang trahedya.

Ginpa-athag pa ni Dela Vega nga nagsunod sa protocol ang Coast Guard sang ginpasugtan ang pagbiyahe sang MB Jenny Vince pila ka oras lang matapos nagkulob ang MB Keziah kag MB Chi-Chi kag ara pa sa tunga-tunga sang search and rescue operations.