Buenavista Wharf sa Guimaras, indi pa safe dungkaan sang RoRo vessels suno sa MARINA

By: Aine Grace Bravo | August 9, 2019

via Aksyon Hotline

Guimaras — Gin-usisa sang Maritime Industry Authority ukon MARINA 6 ang Buenavista wharf agud makita kun puwede madungkaan sang Ro-Ro vessels ukon fastcrafts kahapon, Agosto 8.

Ginpahayag ni Engr. Jose Benancio Vero, OIC sang MARINA 6, nga indi pa safe magdungka sa Buenavista ang bisan ano nga sakayan, Ro-Ro vessel man ukon fastcraft bangud sang dalagku nga balod base sa ila pagpangusisa.

Kun may safe na nga dungkaan sa Buenavista, puwede man suno sa iya pasugtan ang mga sakayan nga magdungka sa amo nga wharf.

Gin-athag ni Vero nga ang mga nagakarga lang sang pasahero ang gin-suspend nga pumpboats pero padayon ang operation sang mga nagakarga sang produkto.

Dugang pa ni Vero nga may polisa nga ginpagguwa sang 2016 pa para sa modernisasyon sang mga sakayan.

Nasaad sa amo nga policy suno kay Vero nga dapat wala na sang mabiyahe nga wooden hull kun may yara na sang steel hull.

May taga-Manila suno kay Vero nga maga-abot agud magpa-athag tuhoy sa phase out sang wooden hull kag kun ano ang alternatibo kag suporta nga mahatag sa mga sakayanon kag operators.