Negosyante nga si Vicente “Itik” Espinosa nga gintudlo mastermind sa pagpatay kay former Ajuy Vice Mayor Ramon Rojas sang 2008, naka-hospital arrest

By: JoMaque | August 10, 2019, 10:30am

Iloilo City (UPDATE) – Ginkumpirmar ni PMAJ Jonathan Pinuela, head sang Iloilo Police Provincial Office (IPPO) Special Operations Group, nga naka-hospital arrest ang negosyante nga si Vicente “Itik” Espinosa, amay ni Iloilo 5th District Board Member Carol Espinosa.

Gindakup sang SOG si Espinosa bangud may warrant of arrest sa kaso nga murder angut sa pagpatay kay Former Ajuy Vice Mayor Ramon Rojas sang 2008.

Gindakup si Espinosa sa Iloilo International Airport kahapon sang hapon, August 9.

Suno kay PMAJ Pinuela, wala man nag-panginpadlus si Espinosa sang nag-upod sa ila. Pero nagtaas ang iya blood pressure suno sa iya doktor rason nga gindala sa Rural Health Unit sang Cabatuan si Espinosa antes gindiretso sa pribado nga ospital sa Iloilo City.

Mayo 22, 2008 sang gintiro patay sang riding-in-tandem si Vice Mayor Rojas samtang naga-jogging sa Sitio Casamata, Barangay Central, Ajuy.

Kaupod ni Rojas si Armando Nacional nga nagtudlo kay Edgar Cordero nga amo ang nagtiro sa vice mayor samtang si Dennis Cartagena ang naga-drive sang motorsiklo.

Mayo 26, 2008 sang gin-file sang Ajuy police ang kaso nga murder batuk kanday Cordero kag Cartagena kag sang Hunyo 2, 2008, ginlakip sa kaso sanday Espinosa kag Lindsey Buenavista alyas Bebe.

Ginpanginwala ni Espinosa ang involvement sa kaso.

Ginatinguhaan pa sang Aksyon Radyo nga makuhaan sang pahayag ang pamilya Espinosa.