Operator sang passenger cargo vessel, posible makabiyahe na halin Iloilo City pa-Guimaras vice versa sa masunod nga semana – MARINA 6 OIC

By: JoMaque | August 10, 2019, 10:32am

Iloilo City – Nagkomiter ang operator sang passenger cargo vessel sa General Santos City nga mapadala sang units agud magbiyahe halin Iloilo City pakadto Buenavista, Guimaras vice versa.

Suno kay Engr. Jose Benancio Vero, MARINA VI OIC, may passenger capacity nga 280 ang passenger cargo vessel.

Ginahikut sa subong ni Vero sa MARINA central office ang mga kinahanglan agud ma-isyuhan sang special permit ang passenger cargo vessel.

Kon mag-abot ang special permit, ginalauman nga makasugod na biyahe ang isa ka unit sa Martes ukon Mierkules sa masunod nga semana.

Bangud indi man RoRo vessel, madungka suno kay Vero ang sakayan sa ginadungkaan man sang mga pumpboats.

Nagapabilin nga kanselado ang biyahe sang tanan nga pumpboats sa Guimaras kasunod sang pagkulob sang tatlo ka pumpboats sang nagligad nga Sabado nga nagresulta sa 31 ka patay.