Maninoy, ginlabu-patay sang iya ihado sa Ajuy

By: JoMaque | August 11, 2019

Ajuy, Iloilo – Patay ang 65-anyos nga maninoy sang ginlabu sang iya ihado sa Badiangan, Ajuy kahapon sang aga, Agosto 10.

May pilas sa ulo kag tangkugo ang biktima nga si Renato Baluro nga residente sang amo nga lugar. Suspek naman si Joseph Borres, 40 anyos nga ihado sang biktima.

Suno kay Police Lieutenant Roy Castro, OIC sang Ajuy Police Station, ginbanggaan ni Baluro si Borres kag ginkumpronta.

Ginapasibangdan ni Baluro si Borres suno kay Castro nga nagtiro sa iya sang una.

Nagpalagyo si Borres pero ginsunod siya ni Baluro kag ginbakol sang baston sang iya nga naabtan.

Nakapanagang si Borres kag iya gin-alegar nga ginpalukpan siya sang pusil ni Baluro.

Gintuyo liwat nga bakulon ni Baluro sang baston ni Borres kag iya nasagang sang binangon kag nalapsan ang ulo sang biktima kag napilas.

Naggabot man sang binangon ang biktima pero sunud-sunod na ang paglabu sang suspect sa iya.

Ginhingagaw pa dala sa Sara District Hospital ang biktima apang gindeklarar nga napatay.

Presu sa Ajuy Police Station ang suspek matapos nagsungka sa ila barangay kapitan.