ArchivesLokalUncategorized

Asawa, nadakpan sa akto ang bana kag iya kerida nga nagahulid sa sulod sang kwarto sa lodging house sa Pototan

By: JoMaque | August 12, 2019

Pototan, Iloilo – Nadakpan sa akto sang asawa ang iya bana upod ang kerida nga nagahulid sa sulod sang kwarto sa lodging house sa Pototan mga las 11 kahapon sang aga, Agosto 11.

Suno kay Police Staff Sergeant Raquel Cayton sang Women and Children Protection Desk (WCPD) sa Pototan Police Station, ginbantayan ni alyas Joy ang iya bana nga si alyas Boy, 53 anyos sa crossing malapit sa lodging house.

Ginpahayag ni Cayton nga nagaduda na si Joy, 52-anyos sa iya bana bangud pila na ka Domingo nga nagahalin sa ila balay ang iya bana kag ginarason nga may kadtuan lang.

Ginsundan ni Joy ang iya bana sang nakita nga nagkadto sa lodging house kag makaligad naman ang pila ka minutos, nakita niya nga nagsulod man si alyas Jane, 38 anyos.

Magka-upod sa trabaho sanday Jane kag Boy suno kay PSSGT Cayton.

Antes nadakpan suno sa iya ni Joy ang iya bana, nagkadto siya sa ila gina-obrahan kag nakumpirmar niya nga wala si Jane.

Suno kay PSSGT Cayton, gin-ako ni Boy nga isa na ka tuig ang relasyon nila ni Jane.

May lima ka kabataan sanday Joy kag Boy.

Disidido naman nga magpasaka sang kaso ang asawa batuk sa iya bana kag kerida.

Preso si Boy kag si Jane sa Pototan Police Station

Leave a Reply