CPP-NPA, gindeklarar persona-non-grata sa Maasin

By: Aine Grace Bravo | August 13, 2019

via Aksyon Aljohn Torreta

Maasin, Iloilo — Gindeklarar sang Municipal Peace and Order Council sang Maasin nga persona non-grata ukon indi welcome sa banwa ang mga Communist Party of the Philippines – New Peoples Army (CPP-NPA) terrorists.

Base sa MPOC Resolution No. 01 series of 2019 nga ginpirmahan ni Maasin Mayor Francis Amboy kag iban pa nga officials, madamo na nga mga kalakasan ang ginhimo sang CPP-NPA sa ila banwa batuk sa mga military, pulis kag sibilyan lakip na sa mga propiedad sang gobyerno kag pribado nga mga indibidwal.

Dugang diri, apektado man ang socio-economic development sang Maasin kasunod sang mga pag-atake kag nagatuga man sang kahadlok sa publiko kag sa mga potential investors.

Ginakondenar man sang MPOC ang CPP-NPA bangud ginaguba nila ang kalinong kag katawhay sa ila banwa.

Madumduman, ginsalakay sang NPA ang Maasin Police Station sang 2017 kag ginpangkuha pa ang gamit sang pila ka mga pulis.

Gin-ambush man sang NPA ang mga katapu sang Regional Mobile Force Battalion sa diin isa ka pulis ang napatay samtang 10 ang napilasan sa insidente.

‘WALA SANG PULOS’

Nag-react naman ang NPA sa lihok sang LGU Maasin. Suno kay Jurie Guerero, Spokesperson sang NPA Central Panay, wala sang pulos ang pagdeklarar sa mga miembro sang CPP-NPA nga persona non grata.

Sa baylo nga NPA, kuntani ang ideklarar suno sa iya sang LGU nga persona non grata amu ang mga opisyal sang gobyerno nga nagapangawat sa kaban sang banwa, mga drug lords kag ila protectors kag mga mass murderers.

Nagapati man si Guerero nga ginhimo ang lihok bangud sa pressure sang military, pulis kag ni Presidente Rodrigo Duterte bangud napaslawan sila sa paglutos sa mga rebelde.